FHN, Təhsil nazirliyi və UNİCEF arasında Fəaliyyət Planı imzalanıb
Bakıda Fövqəladə Hallar Nazirliyi (FHN), Təhsil nazirliyi, BP şirkətinin Azərbaycan, Gürcüstan və Türkiyə üzrə nümayəndəliyi və UNİCEF-in həyata keçirdiyi “Təhsil sahəsində tərəfdaşlar” adlı layihə çərçivəsində Fəaliyyət Planı imzalanıb. FHN-nin saytınin verdiyi xəbərə görə, sənədi fövqəladə hallar naziri, general-polkovnik Kəmaləddin Heydərov, təhsil naziri Mikayıl Cabbarov və UNİCEF-in Azərbaycan nümayəndəliyinin rəhbəri Mark Herevard imzalayıb.
Mərasimdə çıxış edən nazir Kəmaləddin Heydərov Azərbaycanın UNİCEF ilə uğurlu əlaqələrindən danışaraq fövqəladə hallar zamanı bölgələrdə görülən işlərdən bəhs edib.
Nazir imzalanacaq sazişin bölgələrdə yüksək səmərəliliyə malik, uşaqların mənafeyini düşünən məktəb modellərinin hazırlanmasını özündə ehtiva etdiyini bildirib. Layihə təhsil sahəsində FHN, Təhsil Nazirliyi, UNİCEF-in Azərbaycan nümayəndəliyi və bp arasında əməkdaşlığa yeni təkan verməklə yanaşı, yerli əhalinin, xüsusən də məktəblilərin fövqəladə hallar və onlardan qorunma ilə bağlı daha dərin biliklərə nail olmasına şərait yaradacaq.
“Təhsil sahəsində tərəfdaşlar” adlı layihədə ölkədə yeni təhsil modellərinin yaradılmasına yönəlmiş layihələrin hazırlanmasına və həyata keçirilməsinə dəstək verilməsi nəzərdə tutulur.
Anlaşma memorandumu isə Azərbaycanın təhsil sisteminin ölkə üzrə təkmilləşdirilməsi üçün nümunəvi modellərin tətbiqini əhatə edir.
Üçillik layihə xüsusən bp-nin əməliyyatçısı olduğu BTC və CQBK boru kəmərləri boyunca yerləşən Kürdəmir, Ucar, Ağdaş, Yevlax, Samux, Goranboy Şəmkir və Tovuz rayonlarında uşaqların təhsilə cəlb edilməsinə yönəlmiş yeni geniş əhatəli məktəb modellərinin yaradılmasını nəzərdə tutur.
Layihənin dörd komponentdən ibarət olacağı planlaşdırılır.
Buraya ailə təhsil mərkəzləri, hər kəs üçün bərabər təhsil imkanı, təbii fəlakətlərə hazırlıq, gigiyena və sanitariya komponentləri daxildir.
