“Marja” xəbər verir ki, bunu “Azərsun Holdinq”in Müşahidə Şurasının sədri Abdolbari Goozal deyib.
“Hökumət sahibkarları yönləndirə, onlara daha sərfəli regionları və sahələri məsləhət görə bilər. Məsələn, deyə bilər ki, gəl balıqçılıq ilə məşğul ol. Əgər sahibkar fərasətlidirsə, o hər şeydən pul qazanar, hətta üzr istəyirəm, zibildən də milyonlar qazanmaq olar –“Azərsun” tullantılardan kağız buraxdığı kimi. Ona görə də yetər ki, hökumət bu məsələlərdə yönləndirici olmalıdır ki, eyni kənddə eyni zavodlar açılıb bir-birlərinə mane olmasınlar. Yoxsa, ikisi də, işsiz qalacaqlar”.
Abdolbari Goozal qeyd edib ki, hökumətin dəstəyi bu anda tam yetərli deyil: “Yəni daha çox dəstək verilə bilər, bəzi ölkələrdə bu dəstək daha çoxdur”.
“AZƏRSUN”DA DA VARLI ŞİRKƏTLƏR VƏ ŞƏXSLƏR VAR”
Abdolbari Goozal qeyd edib ki, “Azərsun” Azərbaycanın ən iri maliyyə-sənaye qrupu deyil:
“Mən “Azərsu”u ölkənin ən böyük maliyyə-sənaye qrupu adlandırmazdım. Ölkədə “Azərsun”dan da böyük və varlı şirkətlər və şəxslər var. “Azərsun” mənəvi cəhətdən ən böyükdür”.
“GÜCÜMÜZ ÇATAN İŞLƏRƏ BAŞLAYIRIQ”
Holdinqin rəhbəri qeyd edib ki, “Azərsun” bütün işlərlə məşğul olmaq istəmir: “Azərsun”un müəyyən bir həddi, gücü var. Kontrolsuz güc, artıq güc deyil. Çox işlər götürə bilərik, amma öhdəsindən gələ bilmirsinizsə, bu düzgün deyil. Ona görə də biz ancaq gücümüz çatan işlərə başlayırıq. Biz “Azərsun” olaraq qida sektoruna fokuslanmağı planlaşdırırıq. Qida sektorundan o qədər də uzaqlaşmaq istəmirik”.
“MEYDAN BOŞDUR, BAZARDA HAMIYA YER ÇATAR”
İş adamı “Azərsun”un indiyədək təmsil olunduğu sahələrdə yeni rəqiblərin əmələ gəldiyi barədə suala “biz rəqabətə hazırıq” cavabını verərək belə davam edib: “Amma mən buna rəqabət deməzdim. Baxın, qarşımızda bir Azərbaycan bazarı, bir də xarici bazar var. Biz Azərbaycanın bütün torpaqlarını da əksək, xaricdə yenə böyük bir “piroqun” kiçik bir hissəsini əldə edə bilərik. Ətrafımızda 1 milyard insan var, ərəblərdən tutmuş Sibirədək. Bütün Azərbaycan torpaqları da əkilsə, bu bazarın bəlkə 5 faizini tuta bilərik. Yəni meydan boşdur və bazarda hamıya yer çatar. Yetər ki, bir-birlərinə mane olmasınlar və xarici bazarları nəzərə alsınlar”.
