Cebhe.info-nun məlumatına görə, iqtisadçı Rövşən Ağayev “Fitch”in yalnız hökumətin xarici borclarını nəzərdə tutduğunu deyib:

“Lakin son dövrlər hökumətin daxili borcları da sürətlə artır və hazırda məcmu dövlət borclarının ÜDM-də payı 35 faizə çatır. Manat ifadəsində xarici borclar 13 milyard manat, daxili borclar 7.5 milyard manata çatır. Hələ nəzərə alaq ki, dövlət sektorunun hökumət zəmanəti ilə almadığı borclar dövlət borcu statistikasına daxil edilmir.

Beynəlxalq Valyuta Fondunun (BVF) kriteriyası baxımından gerçəkdən də dövlət borcunun hazırki səviyyəsi riskli nöqtəyə çatmayıb. Amma borclanmanın sürəti həddən artıq yüksəkdir. Məsələn, son 2 ildə daxili borcun ÜDM-də payı 2-3 faizdən 12 faizədək yüksəlib. Məlumat üçün deyim ki, BVF-nin meyarına görə, dövlət borcunun yolverilən maksimum (risksiz) həddi inkişaf etmiş ölkələr üçün ÜDM-nin 60 faizi, inkişaf etməkdə olan və aşağı gəlirli ölkələr üçün 40 faiz səviyyəsində tövsiyə olunur”.