“Asharq al-Awsat” xəbər verir ki, ölkənin Müdafiə Nazirliyinin Baş Qəbul və Səfərbərlik Direktorluğu qadınların güc və qabiliyyətlərini bütün sahələrdə, o cümlədən hərbidə tətbiq etməyi mühüm vəzifələrdən biri kimi qarşıya qoyan “Vision 2030” konsepsiyasını rəhbər tutub.
Qurum bundan belə qadınların quru qoşunlarında, hava qüvvələrində, dəniz qüvvələrində, hava müdafiə qüvvələrində, strateji raket qüvvələrində, habelə tibbi xidmətlərdə gizir, kiçik gizir, çavuş, qərargah çavuşu rütbələrində xidmət keçə biləcəklərini açıqlayıb.
Qeyd edək ki, son illər Səudiyyə Ərəbistanında xanımlar Baş Narkotiklər Direktorluğu, Baş Həbsxanalar Direktorluğu, cinayət axtarışı, gömrük xidməti də daxil olmaqla ictimai asayiş sahəsində hərbi rütbə daşıyırlar.
Həmçinin gömrük xidmətində müfəttiş və sıravi əməkdaş, ticarət və səhiyyə müəssisələrində mühafizəçi kimi çalışan xanımların yol təhlükəsizliyi, dairə polisi, asayiş keşikçiləri, həmçinin həcc və ümrə mühafizəsi, silahlar və partladıcı maddələrlə bağlı sahələrdə çalışmaqda davam edir.
Hökumətin bu qərarını mütərəqqi addım kimi dəyərləndirən Mülki Müdafiə Mərkəzinin keçmiş rəhbəri Həsən əl Şəhri qadınlar üçün hərbidə geniş imkanlar açıldığını dilə gətirib.
Səudiyyə Ərəbistanının Şura Məclisinin üzvü Həya əl Maniyə qadınların artıq ölkədə müxtəlif fəaliyyət sahələrinin ayrılmaz parçası olmağa başladığını, onların yeni-yeni sahələrə daxil olmalarının ölkədə gender bərabərliyi baxımından mühüm olduğunu qeyd edib.
