Strateq.az bildirir ki, bu barədə Daxili İşlər Nazirliyi və Baş Prokurorluğun yaydığı məlumatda deyilir.
Məlumatda bildirilir ki, saxlanılan şəxslər barəsində İnzibati Xətalar Məcəlləsinin 510 (Xırda xuliqanlıq) və 535.1-ci (Polis işçisinin qanuni tələbinə qəsdən tabe olmama) maddələri ilə protokollar tərtib edilərək məhkəmələrə göndərilmiş, 56 şəxs barəsində müxtəlif müddətlərə inzibati həbs tənbehi seçilmiş, 18 nəfərə inzibati qaydada cərimə, 9 nəfərə xəbərdarlıq edilmişdir.
Lakin saxlanılan şəxslərin hüquqlarını müdafiə edən vəkillərin müraciətləri nəzərə alınaraq, inzibati həbs olunanlardan 32 nəfəri müalicə üçün Dəri-Zöhrəvi dispanserlərə göndərilmiş, zöhrəvi xəstəlik aşkar edilməmiş 24 nəfər inzibati həbsdən azad edilmişdir. Tibbi-laborator müayinələrin hazırki nəticəsinə görə, 32 nəfərdə müxtəlif zöhrəvi xəstəliklər, o cümlədən 6-da “AİDS”, 6-da “HİV”, 16-da “sifilis”, 2-də “kəskin uretrit, candida albikas və trixomonias”, 2 nəfərdə isə “Hepatit HVC” virusu aşkarlanmış, digərlərində zöhrəvi xəstəliklərin olub-olmamasının müəyyənləşdirilməsi, eləcə də onlar tərəfindən bu xəstəliklərin məqsədli şəkildə yayılmasının qarşısının alınması istiqamətində səhiyyə orqanları ilə birgə təxirəsalınmaz tədbirlər davam etdirilir.
Daxili İşlər Nazirliyi və Baş Prokurorluq onu da bildirib ki, ayrı-ayrı kütləvi informasiya vasitələrində cinsi azlıqlara qarşı, guya, təqiblərin olması və onların hüquqlarının pozulması barədə deyilənlər, belə iddialar tamamilə əsassızdır, reallığı əks etdirmir: “Bir daha qeyd etməyi vacib hesab edirik ki, belə tədbirlərin keçirilməsində məqsəd yalnız ictimai qaydanı pozmaqla vətəndaşların şikayətlərinə səbəb olan şəxslərin müəyyənləşdirilərək məsuliyyətə cəlb edilməsi və ağır nəticələrə səbəb olan yoluxucu zöhrəvi xəstəliklərin yayılmasının qarşısının alınmasıdır”.
