“Yanlışlıq həmin ərazidə hərbçilərin bir-birilə əlaqəni mobil telefon vasitəsilə saxlaması zamanı ola bilər”
Üzeyir Cəfərov: “Hərbçilər arasında hərbi sirrə aid olan bütün danışıqlar xüsusi rabitə vasitəsilə aparılmalıdır”
Fevralın 24-dən 25-nə keçən gecə Ermənistan silahlı qüvvələrinin bütün cəbhə boyu törətdiyi irimiqyaslı təxribatların qarşısını alarkən şəhid olmuş hərbi qulluqçularımız Abdullayev Aqşin İsmayıl oğlu, Nəzərov Şahlar Yaşar oğlu, Haşımlı Tural Əbdül oğlu, Qədimov Zülfü Rəhim oğlu və Cəfərov Zakir Nazim oğlunun nəşi döyüş meydanından çıxarılaraq doğmalarına təhvil verilib.
Məlum olduğu kimi, həmin hərbçilərin meyitləri ermənilərin əlinə keçməsə də, onları döyüş meydanından götürmək ciddi problem yaradırdı. Bu səbəbdən də beynəlxalq müşahidəçilərin məsələyə müdaxiləsi zəruri hesab edildi. Təmas xəttində olan son gərginliklə bağlı Müdafiə Nazirliyinin Mətbuat xidməti müharibə qanunlarına uyğun olan tərzdə peşəkar informasiya siyasəti apardı.
Təbii ki, təxribatçı düşmən mediası bu istiqamətdə yenə öz dezinformasiyalarını yaymaqla məşğul idi. Ancaq son proseslər zamanı diqqəti vacib bir məqam çəkdi. Şəhid olan hərbçilərimizin adları ilk olaraq erməni mediasında işıqlandırıldı və nə qədər qəribə olsa da, həmin məlumat sonradan bizim tərəfimizdən yayılan rəsmi məlumatla üst-üstə düşdü. Məlumdur ki, həlak olan hərbçilərimizin cəsədləri ermənilərin əlinə keçməyib. Belə olan halda, onlar həmin hərbçilərin adlarını haradan və hansı vasitə ilə öyrənə bilərdi?
Hərbi ekspert Üzeyir Cəfərov “Bakı-Xəbər”ə açıqlamasında bildirdi ki, bu olduqca ciddi bir məsələdir:
“Mən sizə təşəkkür edirəm. Ona görə ki, bu cür ciddi mövzu istiqamətində araşdırma aparırsınız. Bəli, nə qədər üzücü olsa da, həmin adlar ilk olaraq erməni mətbuatında qeyd edilmişdi. Bu məsələdə mən düşmən tərəfə hansısa məlumatın bilərəkdən ötürülməsi versiyasını tamamilə inkar edirəm. Yəni casusluq versiyasını qəbul etmirəm. Qənaətimcə, ermənilər bu məlumatı xüsusi cihazlar vasitəsilə əldə edib. Yanlışlıq həmin ərazidə hərbçilərin bir-birilə əlaqəni mobil telefon vasitəsilə saxlaması zamanı ola bilər. Biz dəfələrlə demişik ki, həmin ərazilərdə hərbçilərin mobil rabitədən istifadəsi qadağan edilməlidir. Bu, hərbi təlimatda da öz əksini tapıb. Amma təəssüflər olsun ki, bizim hərbçilər bu vasitədən istifadə edir. Hesab edirəm ki, bu hadisədən sonra əlaqədar qurumlar hərbi hissələrdə bu istiqamətdə ciddi tədbirlər görməlidir. Hərbçilər arasında hərbi sirrə aid olan bütün danışıqlar xüsusi rabitə vasitəsilə aparılmalıdır. Buna ciddi riayət olunmasa, biz daha önəmli məlumatların düşmən tərəfinə sızması ilə qarşılaşa bilərik”.
Məhəmmədəli QƏRİBLİ
