Hörmətli cənab Prezident!

Vaxtınızı “Açıq Məktub”la almağımızın səbəbi çox ciddidir. Bütün cəhdlərimizə, qapı-qapı düşüb ədalət axtarışı təşəbbüslərimizə baxmayaraq, yeddi aya yaxındır ki, ANS-in fəaliyyəti dayandırılıb. Biz həm televiziya, həm radio, həm də internet portalı olaraq, doğma Azərbaycanımıza xidmət etmək imkanından məhrum olmuşuq. ANS SSRİ-nin ilk müstəqil televiziyası olaraq, Sovet imperiyasının dağılmasının, Azərbaycanın müstəqillik qazanmasının nəinki şahidi, eləcə də xalqımızın istiqlal mübarizəsinin şəriksiz salnaməçisi olub. Bizim arxivimizdə Qarabağ müharibəsinin sapand daşından tutmuş, ən müasir silah və hərbi texnikaya qədər, bütün mərhələləri sənəd-sübutla qorunub saxlanır. Dövlət quruculuğumuzun, ən adidən ən aliyə, hər bir faktını biz lentə almışıq. Sabit dövlətə qədər keçilən yollar – inqilab və çevrilişlər, torpaqlarımızın itirilməsinin əsl səbəbləri, yoxsul bir ölkənin iqtisadi inkişafının bütün mənzərəsini ANS-in kadrlarından görmək olar. ANS yalnız onu quran təsisçilərin xüsusi mülkiyyəti deyil, xalqımızın, dövlətimizin milli sərvətidir. Bu gün biz qürurla Azərbaycan silahını dünyaya təqdim edirik, Azərbaycan muğamının beynəlxalq etirafından fəxrlə danışırıq, Azərbaycan idmançısının planetar nailiyyətlərinə sevinirik. Bunlar reallıqdır və fəxr etməli hadisələrdir.

Amma Azərbaycanda istehsal olunan xəbərin dünya səviyyəsində qəbul edilməsi faktı da var və ANS bir Azərbaycan brendi olaraq ölkəmizi adlarını çəkdiyimiz sahələrdən daha əvvəl ləyaqətlə təmsil edib. Biz ANS-in səviyyəsini CNN, BBC, REUTERS və s. kimi nəhənglərə uyğunlaşdırmağa çalışmışıq. Azərbaycan tamaşaçısı və dinləyicisinin heç bir başqa dövlətin xəbər istehlakçısından əskik olmadığını aşılamaqla məşğul olmuş, ona məlumatı dəllal və vasitəçi ilə yox, birbaşa hadisə yerindən çatdırmış, bununla da azərbaycanlılarımızı “ikinci əl”-in istehlakçısı kateqoriyasından çıxarmışıq.

Bu gün dünyanın 60-a qədər ən nüfuzlu telekanalını özündə birləşdirən ENEX birliyində ANS-in yeri keçib gəldiyi şərəfli tarixə tam uyğundur. ANS öz fəaliyyəti, təlqin etdiyi dəyərlərin çoxmiqyaslılığı ilə bir televiziyadan, radiodan və portal olmaqdan qat-qat artıqdır. Biz vətəndaşa yalan danışmadan onun real vəziyyətini göstərməyə çalışmışıq. Biz yaşadığımız problemlərdən də danışmış, tamaşaçı və dinləyicimizlə səmimi olmuş, korrupsiya və rüşvətlə bir ictimai bəla kimi mübarizə aparmağın ən vacib vəzifələrdən biri olduğunu izah etmiş, amma bütün bəlalarımızın əsas səbəbinin Qarabağ müharibəsi olduğunu izah etmiş, hətta Azərbaycanda insan haqları və demokratiyanın mövcud vəziyyətini tənqid edən beynəlxalq qurumlara da ərazi bütövlüyümüzün bərpa olunacağı günədək bütün sahələrdəki problemlərin dözülən olduğunu bildirmişik. Elə bu gün də ANS-in mövqeyi dəyişməyib.

Yarım ildir, qapalı qalan şirkətimiz səbr və inamla, Sizə etibar edərək vəziyyətin aydınlaşacağına, tezliklə öz fəaliyyətinin bərpa olunacağına inanır. Cəmiyyətdə ANS etimad və etibar göstəricisinə çevrilib. 25 illik tariximizdə ən böyük qazancımız ANS-in vətənpərvərlik ideyalarının ardıcıl daşıyıcısı tək qəbul edilməsi olub. Ulu öndər Heydər Əliyev məhz bu keyfiyyətinə görə ANS-ə bir sıra hallarda ölkənin ən mühüm informasiya vasitəsi tək yanaşıb; dövlətə və liderə lazım olan əsas xəbərin məhz ANS-dən yayılmasını təmin edib. Dəfələrlə qeyd edib ki, ANS ən mühüm olanı əla hiss edir, onu sadə və inanılan bir tərzdə cəmiyyətə təqdim etməyi bacarır.

Elə Sizin ozünüz də ANS-in, xüsusilə gənclərin vətənpərvərlik ruhunda tərbiyə olunmasındakı xidmətlərini dəfələrlə nümunə göstərmisiniz. Biz fəxr edirik ki, bu gün 25 yaşı tamam olan Azərbaycan vətəndaşının formalaşmasında ANS-in payı var və aprel döyüşlərində canından keçməyi bacaran gənclərimiz son döyüşə həm də ANS-dən aldıqları ardıcıl vətənpərvər tərbiyədən keçərək getmişdilər.

Hörmətli cənab Prezident!

Biz bu məktubda müstəqillik dövründə Azərbaycanın yaşadığı dramatik, qanlı və şanlı hadisələri, ANS-in bu zaman necə işlədiyini göstərməklə vaxtınızı almaq fikrində deyilik. Amma bircə onu qeyd edirik ki, Azərbaycanın taleyində 25 il ərzində elə bir mühüm hadisə yoxdur ki, ANS onun şahidi və ya iştirakçısı olmasın. 1990-ci ildə hərtərəfli blokadaya düşən Naxçıvan, tam yasaq şəraitində çalışan Heydər Əliyevin yalnız ANS vasitəsilə dünyaya çıxışı, çevriliş və hərbi hərəkətlərlə dolu 1991-1992-ci illər, 1993-cü il Gəncə qiyamı, 1994-cü il oktyabr, 1995-cil mart cevriliş cəhdləri, 2003-cü ildəki vətəndaş qarşıdurması və ardı böyük siyahı tələb edən onlarla hadisələr…

Və bu hadisələrin hər birini cəmiyyətə məhz ANS dövlətimizin maraqları baxımından çatdırıb. Təvazökarlıqdan uzaq olsa da, deməliyik ki, bu gün Azərbaycanın informasiya cəmiyyəti və ümumiyyətlə, mühitimiz ANS-siz kasıb görünür. 2016-cı il iyil ayının 18-dən sonrakı Azəbaycanda sanki bir xəbər qıtlığı var. ANS-in qapadılması insanları əsl xəbərin izinə düşərək gedib Azərbaycanı sevməyən qüvvələrin və qurumlarının fəal olduğu sosial şəbəkələrə çıxmağa təhrik edir. Burda isə artıq onu sahibsiz, ünvansız, bir sıra hallarda təhlükəli məlumatlar gözləyir. Bu gün televiziyaya baxanların sayı sürətlə azalır. Ola bilsin ki, bu həm də ANS-in bağlanmasından narazı olan insanların özünəməxsus etiraz formasıdır. ANS geri qayıdanda onlar da öz kanallarına qayıdacaqlar.

Hörmətli cənab Prezident!

Bu gün ANS-in fəaliyyət göstərdiyi ofisin qapısı möhürlənib. Yarım ildən artıqdır ki, biz öz əmlakımıza toxunmaq imkanından məhrum edilmişik. Bu əmlakın hər birini biz özümüz almışıq, bir qəpik kredit belə almadan. Qazancımızı bu sahəyə qoyub Azərbaycana ən müasir texnikalar və texnologiyalar gətirmişik. Bizə bildirirlər ki, iş gedir, araşdırma aparılır və s. Amma bu işin nə vaxt bitəcəyini demirlər. Bir yandan bizə öz əmlakımızın tozunu belə silmək üçün içəri daxil olmağı qadağan edirlər, bir yandan da yerləşdiyimiz binanın sahibi, Elmlər Akademiyası ən qısa müddətdə buranı boşaltmağı tələb edir, işığımızı, qazımızı kəsirlər. Sığındığımız bir-iki otaqdan çıxarılmağımız üçün, az qala, mühasirə şəraiti yaradırlar ki, dözməyək və buranı tərk edək. Necə tərk edək? Niyə tərk edək? Axı bu dövlətin yaradılmasında, qurulmasında bizim də az-çox xidmətlərimiz var. Məgər biz də bir tikə çörək qazanmalı, öz ürəyimizcə olan işlə məşğul olub Azərbaycana fayda verməli deyilik? Axı ayrı-ayrı təşkilatlar qarşısında ciddi öhdəlikləri olan ANS kimi bir şirkəti yarım ildir ki, bağlı saxlamaq özü-özlüyündə artıq böyük cəzadır! Əgər günahımız varsa, deməli, öz cəzamızı da çəkmişik. Özü də rəsmən bildirilir ki, ANS-in rəhbərliyi haqqında heç bir cinayət işi başlanmayıb. Belədirsə, kimsə bizə yol göstərsin. Kanalımızın fəaliyyətinin bərpası üçün hansı addımları atmalıyıq, onu desin.

ANS bu gün Azərbaycana, xalqımıza, dövlətimizə, onun Ali Baş Komandanına lazımdır! Belə deməyə həm də bizə Prezidentin ictimai-siyasi məsələlər üzrə köməkçisi Əli Həsənovun dediyi bu fikirlər əsas verir: ANS-in bağlanması bu gün hamıdan çox Prezidenti və birinci xanımı narahat edir. Biz isə həm də ona görə narahatıq ki, Sizə, Sizin ailəyə narahatlıq gətirmişik, cənab Prezident!

Bizi qəbul edib dinləməyinizi və Sizə yaratdığımız narahatlığı elə bizim də iştirakımızla aradan qaldırmaq üçün imkan yaratmağınızı xahiş edirik. Bu narahatlıqlara son qoya biləcək yeganə qüvvə isə Sizsiniz, cənab Prezident!